En Hungario Esperanto estas viva lingvo - oficiale

"Post plurjara batalo hungaraj esperantistoj sukcesis rekonigi esperantan lingvon viva," diras Oszkr Princz, la ĝenerala sekretario de Hungaria Esperanto-Asocio.  "Kompreneble por esperantistoj neniam estis dubo pri tio ke la esperanta lingvo laŭdevene estas artefarita, planita lingvo, sed ĝi fariĝis viva lingvo."

emblemo
La Ministerio pri Instruado per letero informis la Hungaran Esperanto-Asocion, ke laŭ la deklaro de Lingvoscienca Instituto de Hungara Scienca Akademio Esperanto kvalifikiĝis kiel viva lingvo. Lastatempe, kelkaj ŝtataj instruinstitutoj ne volis taksi Esperanton lingvo egalrajta al aliaj lingvoj. Ĉi tiu antaŭjuĝo bremsis ĝis nun la instruadon de la internacia lingvo.

De la jaro 1995 estiĝis interesa fenomeno en Hungario pro la apero de leĝo pri la deviga ekzameniĝo pri fremdaj lingvoj en altlernejoj kaj universitatoj.  "Ekde tiu tempo abrupte ekkreskis la nombro de tiuj gestudentoj kiuj trapasas ŝtatan lingvoekzamenon," klarigas Princz, kiu ankaŭ kunordigas la esperantlingvajn ekzamenojn ene de la Fremdlingva Pluperfektiga Centro (FPC).  La plimulto de gestudentoj dum la lastaj jaroj trapasas ŝtatan lingvoekzamenon pri la lingvoj angla, germana, franca.  En la jaro 2002 en la popolarecolisto la trian lokon okupis Esperanto, forpuŝante de la tria loko la francan.

Studentoj preferas Esperanton pro tio ke ĝi estas facile lernebla kaj la reguloj preskaŭ senesceptaj.  Lingvistoj kalkulas ke komencanto bezonus sesonon de la tempo por lerni Esperanton ol aliajn lingvojn, ekzemple la anglan, francan aŭ germanan.  "Nun ni jam povas denove proponi Esperanton inter la elekteblaj studobjektoj en lernejoj funkciantaj sur ĉiuj niveloj." La sukceso, laŭ Princz, ankaŭ baziĝis sur la plurjardekaj agadoj de esperantistaj lingvistoj kaj jam mortintaj kaj nun laborantaj en pluraj lingvaj institutoj, kaj universitataj katedroj.