Baza Esperanta Radikaro

pilger

Bazaj Radikoj : Esperanto-Esperanto

Wouter F. Pilger prezentas vortaron, kiu celas ne difini vortojn sed ilin komprenigi en kunteksto.  Li donas indikojn per kiel eble elementaj vortoj.  UEA aperigis version de la vortaro en decembro 2001 sub la titolo Baza Esperanta Radikaro.  Sed Pilger ankoraŭ prilaboras kaj redaktas la interretan version. La unuaj paragrafoj aspektas iom kompleksaj sed la ligilo maldekstraflanka ĉi tie kondukas rekte al la enhavo mem.  Jen kelkaj ekzemploj el la vortaro:

bovo : * granda bredata remaĉanta mambesto (Bos) (homoj trinkas la lakton de bovinoj) (bovino muĝas: "mu-u") {*5}

gusto : sensaĵo en la buŝo [dolĉa, amara, acida, sala]; ies kriterioj por (mal)ŝati; gusti: kaŭzi sensaĵon en la buŝo {7}

interesi : * veki scivolon (ĉu en la afero estas ia utilo, profito, kono aŭ scio (por iu)); interesiĝi: esti scivola (ĉu la afero povas prezenti iel utilon,...); interesa: kio eble povas prezenti ian utilon, profiton, konon aŭ scion (por iu); scivolo-veka {*3}

-n : * [-o -as --> -(o)n / -(o)n <-- -as -o] [komplemento sen prepozicio: i.a. objekto, daŭro, mezuro] (tiu viro legas libron; li vidas tiujn altajn arbojn; mi vidis ŝin, sed lin mi ne vidis; tion ni pripensu; li farbis la bluan pordon ruĝa; mi konas lin kiel ĉefo (mi=ĉefo); mi konas lin kiel ĉefon (lin=ĉefon); li dormis du horojn (=dum du horoj); tio daŭras unu horon; ŝi pagis unu eŭron; tio kostas du dolarojn; tri horojn longa filmo; du metrojn alta viro; (mi deziras) bonan nokton!) {*0}