Vortareto de Hejmaĵoj en Esperanto
kun tradukoj en 13 lingvojn

Hejma Vortaro celis helpi tiujn parolantojn de Esperanto, kiuj uzas la lingvon hejme kiel ĉiutagan komunikilon. Ordinaraj vortaroj ja ne ĉiam utilas, kiam oni serĉas nomon por iu enhejma aĵo aŭ ago. Kompreneble oni ofte povas utiligi la riĉan vortfaran sistemon de Esperanto por mem krei taŭgajn vortojn, sed estas bone ekscii, kiel aliaj familioj Esperant-lingvaj solvis similajn problemojn. Hejma Vortaro tamen ne strebis al plena unueco de la enhejma Esperanto, ĉar la tre variaj lokaj cirkonstancoj ja nature speguliĝas ĝuste en la lingvaĵo ĉiutaga. Oni rigardis ĉi tiun vortaron kiel helpilon, ne kiel la normon.

La materialon por la vortaro kolektis la anoj de la komputil-reta diskutejo DENASK-L kaj la kunlaborantoj de Rondo Familia de UEA. Ĝi ne estis provo sisteme kovri la centran vortostokon pri hejmaĵoj — ĝi estis nesistema kaj iom kaprica kolekto de vortoj, kiuj jen montriĝis aparte problemaj, jen ŝajnis alikiale diskonigindaj.

Hejma Vortaro proponis Esperantajn nomojn por diversaj ĉiutagaj aferoj kun traduko en dek tri lingvojn.   Ĝi ne estis traduka vortaro el Esperanto en naciajn lingvojn aŭ inverse. Tiuj ĉiutagaj aferoj estis rekoneblaj per la Esperant-lingvaj difinoj, helpataj de la nacilingvaj tradukoj. Tial la Esperantaj vortoj povas havi pliajn signifojn, kiujn la difinoj ne montras.

La nacilingvaj tradukoj ne plene koincidis kun la difinoj, nek unu kun aliaj. Ĉar la realoj, en kiuj la Esperantaj familioj vivas, varias de lando al lando, de regiono al regiono, la Esperantaj vortoj ne povas havi ĉie tutsaman signifon.  Kio en unu familio nomiĝas "bulko", ne aspektas kiel la "bulko" de iu familio alilanda. Tamen estus eraro difini "bulkon" tiel precize, ke ĉi tie aŭ tie oni ne plu povus uzi la vorton. La variado de la ĉiutagaj vortoj estas kutima afero en ĉiuj lingvoj parolataj en multaj landoj, kiel cetere montras ankaŭ la laŭlanda variado de ekzemple la anglaj, francaj aŭ hispanaj tradukoj en Hejma Vortaro.

La enhavo de Hejma Vortaro estas nun inkluzivita en la Vikian Vortaron